Punonjësit e policisë së burgjeve do të vishen me uniforma dhe këpucë të reja, që do të kushtojnë rreth 2000 euro për individ. Tenderi me vlerë 6.6 mln euro po shqyrtohet në komisionin e ankesave, pasi kompanitë që hynë në garë kanë ngritur pretendime në muajin nëntor.
Drejtoria e Burgjeve planifikon t’i veshë punonjësit e saj me uniforma dhe këpucë të reja. Për këtë qëllim është vënë në dispozicion një fond me vlerë 6.6 milionë euro, ku 5.4 mln do të kushtojnë rrobat dhe 1.2 mln këpucët. Por, sa është kostoja për një efektiv? Policia e Burgjeve numëron rreth 3600 efektivë, çka do të thotë se për veshjen e një gardiani do të shpenzohen 2000 euro.
Në fakt, tenderi i mbyllur në javën e dytë të dhjetorit, nuk e ka një firmë fituese, pasi për një muaj që qëndroi i hapur dolën ankesa nga 2 kompani fasone që hynë në garë.
Një prej firmave fasone ka qenë e paqartë me kushtet e vendosura për materialet që do të prodhohen uniformat dhe kohën e pamjaftueshme për të përgatitur dhe dorëzuar mostrat.
Ndërkohë, firma e dytë ka kërkuar ndryshim të kritereve për të hyrë në garë.
Tashmë sipas rregullores, Komisioni i prokurimeve do të shqyrtojë ankesat dhe nëse do të shpallen të arsyeshme, gara rihapet me kushte të ndryshuara.
Në gusht 2022, Këshilli i Ministrave vendosi që Policia e burgjeve të pajisej me uniforma të reja të standartizuara, gati një dekadë pasi kishte uniformat aktuale.
Uniformat e reja do të jenë të ndryshme sipas stinëve, ndërsa të reja do të jenë edhe gradat, stemat dhe simbolet e punonjësve të policisë.
Lajmin për uniformat e reja të 3559 punonjësve të Policisë së Burgjeve e kishte bërë publik ish-ministrja e Drejtësisë, Etilda Gjonaj, në janar 2021, duke sjellë foto nga uniformat e reja të Policisë së Burgjeve.
“Për herë të parë gjatë këtij mandati dhe pas një dekade, arritëm të pajisim me uniformë 3559 punonjës policie me qëllim, trajtimin me dinjitet të tyre”, shprehej Gjonaj.
