Ish-myftiu i Tiranës Ylli Gurra ka reaguar mbi rastin e fundit në Shkodër ku një vajze myslimane me shami iu mohua punësimi në “Big Market”, por më pas rrjeti i supermarketeve u tërhoq dhe sqaroi se bëhej fjalë për një keqkuptim. Gurra tha në MCN Live se harmonia fetare “s’duhet të jetë vetëm një stoli që vishet ditën e Bajramit, por pjesë e jetës”.
Ai kritikoi Komunitetin Mysliman të Shqipërisë duke theksuar se duhet të jetë pjesë e zgjidhjes.
“Që të shkojmë në urrejtje fetare, është e rëndë. Unë problematikën e shoh duke qenë se bëhet fjalë për një përfaqësim. E shoh te mënyra e mbrojtjes nga institucionet që i përfaqësojnë. KMSH një nga obligimet që ka jo vetëm mbrojtja, por edhe komunikimi publik. Në raste të tilla KMSH duhet të jetë detyrimisht pjesë e zgjidhjes, që te paraqitja e amendamenteve ligjore, marrëveshjet me ministrinë e Kulturës, bashkitë e me radhë që këto vajza dhe qytetare në aspektin fetar ta kenë të konfirmuar mbrojtjen ligjore”, tha Gurra.
“Komuniteti Mysliman s’ka një zë publik. Prandaj vijnë ndërhyrjet personale, apo anashkalimet ndoshta nga myftiu i Shkodrës. Nuk duhet parë vetëm në aspektin fetar, por edhe ligjor që bizneset të jenë të qartë për ligjin, qoftë për një vajzë me shami apo me kryq”, shtoi ai.
