Veliaj thirrje: Aplikoni që sot, ja tre hapat për të përfituar qira falas nga bashkia

Jane mbi një mijë familjet që kanë mbetur pa strehë pas tërmetit që mund të përfitojnë qira falas nga Bashkia e Tiranës. Familjet, banesa e të cilëve është konstatuar dhe vulosur nga instituti i ndërtimit si e pabanueshme, mund të aplikojnë që sot pranë njësive të tyre administrative për të përfituar shumën prej 18, 22 apo 27 mijë lekësh të rinj/muaj për t’u strehuar për një vit rresht, derisa bashkia të gjejë zgjidhjen përfundimtare për banesat e tyre. Përveç mundësisë për përfitim që përllogaritet t’u shërbejë 1082 familjeve, bashkia ka thjeshtuar dhe mënyrën e përfitimit të bonusit të qirasë në masën 100%. Mjafton një mjet identifikimi, një certifikatë familjare që tregon sa persona janë në trung, për të plotësuar formularin që i bën ata përfitues të shumës që siguron strehim në një shtëpi të strukturës 1+1, 2+1 apo 3+1 (sipas vlerave të lartpërmendura). Hapi i tretë është hapja e një llogarie bankare për derdhjen e shumës së përmuajshme nga bashkia.