Izolimi i zonës së Lombardisë në Itali për shkak të koronavirusit ka sjellë pasoja edhe në Shqipëri. Shumë linja ajrore kanë anuluar fluturimet në drejtim të shtetit fqinj. Operatorët ajrorë që kryejnë fluturime nga Tirana drejt Milanos, kanë filluar që sot t’i anulojnë fluturimet. Siç shihet edhe në faqen zyrtare të aeroportit të Rinasit, të paktën tre fluturime janë anuluar.
I pari është fluturimi drejt Romës i planifikuar në 5.30 të mëngjesit nga Air Albania. Po ky operator ka anuluar dhe fluturimin që është parashikuar për në Milano në orën 11.15, si dhe atë për në Bolonjë në orën 18.20.
Mësohet se operatorët e Air Albania kanë thanë se të gjitha fluturimet me Italinë ditën e sotme janë anuluar për arsye operacionale nga kompania, por nuk kanë theksuar së çështja ka të bëjë me situatën nga koronavirusi. Gjithashtu nuk dihet nëse në ditët e ardhshme do të ketë sërish anulime fluturimesh.
Qeveria italiane miratoi dje në mbrëmje dekretin që bllokon lëvizjen në rajonin verior të Lombardisë, pasi po përpiqet të frenojë përhapjen e koronavirusit. Dekreti ka zgjatur “zonat e kuqe” të karantinës, duke i urdhëruar njerëzit të mos hyjnë ose të largohen nga rajoni, përveç rasteve serioze.
