Temperatura e lartë dhe rezistente me të cilën po shfaqet ky grip ka bërë që shumë persona para se të konsultohen me mjekun ti drejtohen farmacive dhe të nisin antibiotikët. Bluzat e bardha të cilat përballen me pacientë të tillë çdo ditë thonë se antibiotiku nuk mjekon virozën, por komplikacionet që vijnë prej saj dhe nuk duhet përdorur në ditët e para të sëmundjes.
“Mjekohen komplikacionet kështu është e gabuar përdorimi i antibiotikëve kaq shpejt. Ndodh një luftë brenda organizmit, 2-3 ditët e parë s’ka asnjë merak, kuptohet temperatura 39- 40 do pak vëmendje pavarësisht se ato persistojnë dhe mund të jenë agresive nga njëra anë dhe të qëndrueshëm kundrejt antipiretikëve nuk duhet të na shqetësojë, shumë lëngje, antipiretikë dhe çlodhemi. Ato me sëmundje shoqëruese apo me probleme pulmonare kronike aty do këshillë mjekësor që në ditët e para.”, thotë mjeku pneumolog Ardian Jorgji.
Shqetësuese për mjekët është kur kjo temperaturë zgjat më shumë se pesë ditë. Sipas tyre mund të jetë tregues i një ndërlikimi dhe rastet kur virusi ka shkaktuar probleme në mushkëri janë shtuar.
“Nëse një temperaturë persiston për më shumë se 5-6 ditë me patjetër duhet këshillë mjekësore. Kolla kur fillon dhe përkeqësohet apo shtohet gjithashtu kërkon këshillë mjekësore, gjendja e përgjithshme jo e mirë që shpesh neglizhohet ose dobësia trupore, kur këto fillojnë e rëndohen gjithashtu është një shenjë që pacient të marr këshillë. Çdo virozë e lënë pas dore bart rrezikun për të bërë komplikacione dhe meraku duhet për të tilla situata. Po më një bashkëpunim të mirë, përkujdesje, disiplinë në marrjen e terapisë s’ka asgjë për tu shqetësuar.”
Pas festave dhe me rikthimin e fëmijëve në kopshte e shkolla të prekurit nga gripi mbushën spitalet e qendrat shëndetësore. Ai që dominon është tipi A me nënvariantin e tij AH3N2 I, i cili e gjeti popullatën më pak të imunizuar pasi vitet e fundit në mbizotërim ka qenë AH1N1.
