Vlora mes “Rrugës së Re” dhe “Etjes së Vjetër”
Njoftimi i radhës nga Ujësjellës Kanalizime Rajoni Vlorë për ndërprerjen e radhës më 28 prill nuk është më një lajm, por një “déjà vu” e hidhur. Ndërsa qyteti reklamohet si perla e turizmit dhe kantier ndërtimi, banorët e lagjeve si “1 Maji”, “Kume”, dhe gjithë vija bregdetare nga Lungomare deri në Jonufër, duhet të përgatiten sërish me bidonë e kova.
Paradoksi i “Rrjetit të Ri”
Pyetja që lind natyrshëm është: Sa nyje ka ky rrjet që nuk mbaron kurrë së u lidhuri?
Është ironike që në vitin 2026, pas premtimeve të panumërta për furnizim 24 orë, qytetarët ende duhet të llogarisin orët e pasdites për të mbushur depozitat.
Punimet e herëpashershme tregojnë ose një inxhinieri të dobët, ose një mungesë totale koordinimi.
Nuk mund të ketë “stakim të detyruar” çdo javë për të njëjtin projekt që supozohet të sillte zgjidhje.
Në prag të sezonit, zonat më vitrine të qytetit (Uji i Ftohtë, Lungomare) mbeten pa pikën e ujit.
Ky nuk është imazhi i një Vlore moderne, por i një qyteti që lëngon nën menaxhimin e dobët të burimeve bazë.
Ujësjellësi kërkon mirëkuptim, por mirëkuptimi është ezauruar bashkë me ujin në rubinetat tona. Faturat vijnë rregullisht, ndërsa shërbimi vjen me “pika”. Erand Haruni
