Një 32-vjeçar është arrestuar në Vlorë pasi u kap duke qarkulluar me një automjet tip Audi, i armatosur me një pistoletë dhe me një radio të ngjashme me ato që përdor Policia e Shtetit.
Arrestimi u bë në kuadër të operacionit policor të koduar “Siguria”, i zhvilluar nga shërbimet e Drejtorisë Vendore të Policisë Vlorë, me synim rritjen e parametrave të sigurisë dhe parandalimin e ngjarjeve kriminale, si dhe goditjen e rasteve të armëmbajtjes pa leje.
Sipas Policisë, operacioni u organizua pas informacioneve të siguruara në rrugë operative se një person po lëvizte i armatosur në qytetin e Vlorës.
Si rezultat i ndërhyrjes, në lagjen “Lef Sallata” u kap dhe u arrestua në flagrancë shtetasi E. M., 32 vjeç, banues në fshatin Peshkëpi.
Gjatë kontrollit të ushtruar në automjetin tip Audi, efektivët e Policisë sekuestruan, në cilësinë e provës materiale, një armë zjarri pistoletë, dy krehra me 22 fishekë luftarakë, një mbajtëse plastike me 18 fishekë luftarakë, në total 40 fishekë, si dhe një radio të ngjashme me ato që përdor Policia e Shtetit.
Materialet procedurale i janë referuar Prokurorisë për veprime të mëtejshme, ndërsa ndaj 32-vjeçarit rëndojnë akuzat për veprat penale “Prodhimi dhe mbajtja pa leje e armëve luftarake dhe e municionit” dhe “Mbajtja pa të drejtë e uniformës”.
