Hyrje-daljet nga qyteti i Elbasanit mbrëmjen e sotme kanë kaluar në filtrin e policisë që ka ngritur disa pika postblloku. Policia ka ushtruar kontrollet në kërkim të personave të skeduar. Paraprakisht nuk raportohet për persona të shoqëruar, megjithatë pritet raporti zyrtar nga policia e Elbasanit. Qyteti u trondit javën e kaluar nga një vrasje e dyfishtë.
Kamerat e sigurisë kanë mundur të zbardhin mekanizmin e vrasjes së dyfishtë në qytetin e Elbasanit, ku viktima mbetën Ardian Çollaku dhe Lulzim Bitri.
Automjeti tip Volvo, në të cilin lëviznin vrasësit, ka pasur shënjestër të dy viktimat, të cilit ishin ulur në barin e karburantit.
Fillimisht, njëri prej shënjestrave çohet nga tavolina dhe futet në brendësi të karburantit, ndërsa për hetuesit automjeti është dashur të kalojë pranë zonës e të rikthehet sërish kur njëri prej viktimave u ul sërish në tavolinë.
Pas kësaj, dy persona të kamufluar me paruke dalin nga makina. Njëri prej tyre mban një armë automatike me silenciator, ndërsa tjetri pistoletë. Zona ka qenë e populluar dhe për shkak të silenciatorit, asnjë nuk ka kuptuar se çfarë po ndodhte në të vërtetë vetëm kur kanë parë Bitrin dhe Çollakun të shtrirë.
Në vendngjarje, policia gjeti vetëm gëzhoja të automatikut, i cili rezulton se është arma e vetme e përdorur, kjo dhe pas gjetjes në makinën e djegur te dy armëve automatike, por jo të pistoletës.
