Autori i dyshuar i vrasjes së 28-vjeçarit Ardian Baloshi në Paskuqan, Sadik Llanaj, vijon të jetë në kërkim nga autoritetet, ndërsa për kapjen e tij janë angazhuar edhe forcat speciale RENEA.
Lajmi u konfirmua nga drejtori i Policisë së Tiranës, Oliger Torba, i cili bëri të ditur se është ngritur një grup i posaçëm hetimor për lokalizimin dhe arrestimin e të dyshuarit, duke marrë parasysh rrezikshmërinë e tij.
Sipas Torbës, deri më tani janë ushtruar kontrolle në më shumë se 20 banesa, ndërsa operacioni vijon intensivisht në disa zona.
“Në lidhje me autorin e dyshuar të vrasjes, Sadik Llanaj, gjej rastin të falënderoj qytetarët sepse kemi pasur një bashkëpunim të ngushtë. Për këtë arsye është ngritur një grup duke marrë parasysh rrezikshmërinë e tij dhe janë ushtruar mbi 20 kontrolle banesash. Aktualisht vijon puna për kapjen e tij dhe, për shkak të rëndësisë së operacionit, vijojnë të angazhohen forcat RENEA. Besojmë se shumë shpejt do të kapet ky person”, deklaroi Torba.
Ai vlerësoi gjithashtu bashkëpunimin e qytetarëve, duke theksuar se informacionet e dhëna prej tyre kanë qenë të vlefshme për ecurinë e hetimeve dhe operacionit të kërkimit.
