Gjykata e Lushnjes pritet të japë të martën masën e sigurisë për Orgest Xhelilin. Ai akuzohet për plagosjen e kryebashkiakut të Divjakës, Fredi Kokoneshi dhe shoferit të tij, Gazmend Bullari, mëngjesin e së premtes. Xhelili pritej të njihej këtë të hënë me masën e sigurisë, por seanca u shty për të martën.
Gazetarja Anila Sefa, raporton se autori i dyshuar ndodhet në burgun e Divjakës. Ai është marrë në pyetje nga hetuesit, para të cilëve e ka pranuar autorësinë e plagosjes së dyfishtë. Po ashtu, ai mësohet se ka deklaruar se pushimi nga puna si inxhinier në Bashkinë e Divjakës, ka qenë pikënisja e konfliktit.
Sefa po ashtu raporton se si Kokoneshi ashtu edhe shoferi i tij janë në gjendje të mirë shëndetësore. Ata vijojnë të qëndrojnë në spital. Kryebashkiaku ndodhet nën kujdesin e mjekëve në spitalin e Traumës në Tiranë. Ai u soll në kryeqytet pasi një nga goditjet me thikë i preku mushkërinë. Ndërsa Gazmend Bullari ndodhet ende në Reanimacionin e Spitalit të Lushnjes, pasi plagosja që mori në bark, i preku disa organe. Megjithatë, fatmirësisht të dy të plagosurit janë jashtë rrezikut për jetën.
Gazetarja po ashtu raporton se ata kanë dhënë edhe dëshminë e tyre për ngjarjen. Ata kanë reaguar se si çdo ditë, e premtja ka qenë një ditë pune. Gjithçka ka ndodhur në momentin kur kryebashkiaku po futej për në zyrën e tij. Xhelili i ka dalë para dhe i ka sharë e ofenduar dhe si kryefjalë të zënkës së tij ka pasur largimin e punës, thotë Sefa. Largim që kishte ndodhur rreth 1 viti e gjysmë, por që 46-vjeçari sipas gazetares nuk e kishte harruar.
Sipas dëshmisë së të plagosurve, ata janë përpjekur ta qetësojnë, por në momentin që kryebashkiaku Kokoneshi ka kthyer kurrizin për t’u larguar, Xhelili e ka goditur dy herë me thikë pas shpine, duke e prekur në shpatull dhe brinjë. Gazetarja thotë se ka qenë ndërhyrja e shoferit që ka bërë të mundur shpëtimin e Kryebashkiakut. Pikërisht gjatë kësaj ndërhyrjeje shoferi mbeti i plagosur edhe vetë.
Sefa thotë se asnjë nga avokatët e Lushnjes nuk ka pranuar ta përfaqësojnë me vullnet të lirë autorin e dyshuar të plagosjes së dyfishtë, me arsyetimin se është një krim që nuk ka arsye të mbrohet dhe nuk ka një shkak që të justifikosh një vepër të tillë, plagosjen e rëndë të dy personave. Në këto kushte avokati do të përcaktohet nga shteti.
