Policia e Durrësit ka zbuluar sot një banesë e cila ishte kthyer në laborator për prodhimin i lëndëve narkotike. “Shtëpia e barit’ u zbulua gjatë operacionit “Rent”, ku pas hetimeve u zbulua se Ismail Alija kishte marrë me qira një banesë në katin e dytë të një pallati dhe e kishte përshtatur atë për prodhimin e lëndëve narkotike.
Në banesën e marrë me qira nga Alija u gjetën dhe u sekuestruan 2 kilogram lëndë narkotike e dyshuar kanabis e tharë, e bërë gati për shitje, 110 vazo në të cilat ishin kultivuar fidanë të dyshuar kanabis, 19 llamba dhe pajisje të tjera elektrike. Në momentin e ndërhyrjes së policisë, Alija që kishte marrë me qira këtë apartament nuk është gjetur në banesë. Ai është shpallur menjëherë në kërkim dhe vijon puna për lokalizimin dhe kapjen e tij. Në bashkëpunim me Prokurorinë e Rrethit Gjyqësor Durrës, po punohet për identifikimin dhe kapjen e personave të tjerë të përfshirë në këtë veprimtari kriminale.