Një 70-vjeçare ka humbur jetën në Korçë. Gruaja ndërroi jetë nga asfiksia, pasi ra zjarr në banesën e saj.
Ngjarja e rëndë ndodhi në orët e para të mëngjesit në lagjen nr.13 të qytetit.
Fqinjët e 70-vjeçares e cila ka ndërruar jetë si pasojë e asfiksisë pasi banesa e saj u përfshi nga flakët, kanë rrëfyer se jetonte vetëm dhe se ishte paralizuar nga këmbët muajt e fundit.
Sipas njërës prej fqinjeve, Fluturie Potka kishte një vajzë dhe një djalë, ndërsa nuk kishte pranuar të jetonte me ta, pasi donte të rrinte vetëm.
Ajo u shpreh se asaj i shërbente një zonjë, ndërsa shton se edhe gratë e tjera të lagjes e ndihmonin për pazaret.
“Kishte një zonjë që kujdesej për të. Ka një djalë, i patë thënë të shkonte me të ajo nuk donte. Hajde se kemi dhe një shtëpi tjetër i tha djali, në kat të dytë, ajo thoshte: “jo se nuk zbres dhe nuk hipi dot”. Jetonte vetëm, ka disa muaj që u paralizua nga këmbët. Kishte një që kujdesej për të, e ndihmonte me sa kishte mundësi.
Jetonte vetëm, kishte vite. Nuk donte të shkonte me djalin. Ka një djalë dhe një vajzë. “Dua të rri veç” thoshte, donte rehatinë e saj. Kush i di problemet. Dilte ne ballkon, por kohët e fundit na hidhte çantën poshtë, që t’i merrnim gjera”, tha fqinja e viktimës
Nuk dilte nga shtëpia. Bukën, gjerat ja merrnin gratë e tjera, shoqet, unë”, tha një tjetër.
Sipas informacioneve dyshohet se zjarri ka ardhur si pasojë e jorganit me korrent që përdorte e moshuara. Mësohet se Fluturie Potka ka pësuar edhe djegie.
Njoftimi i policisë
Korçë/Informacion paraprak
Më datë 15.01.2026, rreth orës 09.10, në lagjen nr. 13, Korçë, ka rënë zjarr në banesën e shtetases F. P., rreth 70 vjeçe, e cila si pasojë e asfiksisë, ka ndërruar jetë.
Shërbimet e policisë dhe të zjarrfikëses ndodhen në vendngjarje, për të bërë të mundur shuarjen e zjarrit.
Grupi hetimor po punon për të përcaktuar shkakun e rënies së zjarrit dhe për të bërë dokumentimin e plotë të rrethanave të ngjarjes.
