Dy vatra të mëdha zjarri kanë përfshirë pyjet e Dibrës dhe Bulqizës, ku kërkohet ndërhyrje alarmante pasi flakët kanë shkrumbuar dy banesa në fshatin Vlashaj dhe po rrezikojnë që të djegin të tjera. Fatmirësisht të dy banesat ishin të pabanuara dhe zjarri ka shkaktuar vetëm dëme materiale.
Këto vatra zjarri vijojnë të djegin pyjet e maleve të Lurës prej tre ditësh. ndërsa situata është alaramante edhe në malësinë e Bulqizës.
Deri më tani si pasojë e zjarrit janë djegur të paktën 10 ha pyje e shkurre. Banorët të alarmuar kërkojnë ndërhyrje nga ajri pasi zjarri nuk mund të shuhet nëpërmjet tokës për shkak të terrenit të vështirë.
Përveç vatrës në fshatin Vlashaj të Lurës, vatra tjetër e zjarrit është në Shupenzë, ku flakët kanë përfshirë pyjet me dushqe në fshatin Mazhicë.
Edhe në këtë fshat zjarri po u afrohet banesave dhe besohet se janë djegur rreth 5 ha.
Ndërkohë pranë vatrave të zjarrit ku kanë patur mundësi për të kaluar kanë shkuar forcat zjarrfikëse si dhe policia të cilët po mundohen të izolojnë flakët. Po ashtu kanë ndërhyrë edhe emergjencat civile të cilat bëjnë me dije se nuk ka patur deri më tani ndërhyrje nga ajri, por nëse situata do të rëndohet, nuk përjashtohet si mundësi për të shuar flakët.
