Aeroporti ndërkombëtar “Vincenzo Bellini” në Katania është pushtuar nga flakët mbrëmjen e djeshme pas orës 23:00.
Zjarri ka nisur në bazën e poshtme të terminalit ajror, por fatmirësisht nuk pati të lënduar, pasi aeroporti u braktis nga pasagjerët me nxitim.
Sac, kompania administruese e aeroportit të Katanias, komunikon se, për shkak të zjarrit që shpërtheu në terminal, operacionet e fluturimit janë pezulluar deri në orën 14:00 të datës 19 korrik.
Sakaq, mediat italiane raportojnë se në katin e fundit të aeroportit ka pasur momente frike të forta, teksa terminali u mbush me tym të dendur.
Në rrëmujën e përgjithshme që u krijua prej zjarrit kishte nga ata që bërtisnin dhe që qanin, të shtyrë për tu larguar me shpejtësi nga personeli i sigurisë që bërtisnin “të gjithë jashtë“.
Qendra Operative e Zjarrfikësve bëri të ditur se zjarri u lokalizua dhe u fik nga ekipet që ndërhynë me shpejtësi nga selia qendrore e komandës Etna.
Zjarrfikësit janë ende në punë në aeroportin e mbushur ende me tym, për të kryer operacionet e fundit të pastrimit dhe për të zbardhur shkaqet e zjarrit.
Ndërkohë vijojnë operacionet e kontrollit dhe bonifikimit të aeroportit.
