“Edi Rama detyroi sot Erion Veliajn dhe Arben Ahmetajn të bëhen qesharakë në sytë e shqiptarëve. Duke bërë sikur nuk kuptojnë për çfarë kanë firmosur, ata synojnë të mbulojnë skandalin tjetër në zonën pranë Unazës së Re”. Kështu nis reagimi i Partisë Demokratike në përgjigje të kundër-akuzave nga Bashkia Tiranë dhe Ministria e Financave.
Partia Demokratike i bën katër pyetje kryeministrit Rama dhe kryebashkiakut të Tiranës Veliaj.
“E vërteta, e bazuar në dokumenta është se Edi Rama dhe Erion Veliaj kanë ndryshuar Planin Urbanistik të Tiranës, në mënyrë që Lumi i Lanës të mos prekë tokën ku Edmond Bego do të investojë 60 milionë euro para të pista.
E vërteta është se privatizimi i zonës së ish Serave është bërë me firmën e Arben Ahmetajt.
Edi Rama dhe Erion Veliaj duhet t’u thonë shqiptarëve:
1-Pse u ndryshua Plani Urbanistik i Tiranës dhe pse u devijua Lumi I Lanës në në zonën ku planifikon të ndërtojë Edmond Bego?
2-A ka aplikuar Edmond Bego për leje ndërtimi me projektin e hartuar nga kompania italiane MISALAB?
3-A ka regjistruar në hipotekë Edmond Bega pronat për efekt të ndërtimit të pallateve?
4-A do të prishen banesat e 200 familjeve për t’i hapur rrugë ndërtimit të pallateve nga Edmond Bega”, thuhet në reagimin e selisë blu.
“Partia Demokratike e ka të qartë se Edi Rama dhe Erion Veliaj nuk mund të përgjigjen dot, sepse janë pjesë e projektit mafioz për pastrimin e parave të pista të krimit”, mbyllet reagimi.
