Avokati Altin Goxhaj përmes ekranit të FaxNews akuzoi Policinë e Shtetit se nuk po i ofronte kujdes shëndetësor një protestuesi 20-vjeçar të ndaluar në komisariatin nr.1. Goxhaj u shpreh se pasi e kishin rrahur, efektivët nuk I siguruan ndihmë mjekësore të riut duke e lënë në gjendje të rëndë.
Në lidhje me këtë lajm ka reaguar dhe Policia e Shtetit, e cila rendit akuzat që rëndojnë mbi 20-vjeçarin përmes një liste të gjatë, dhe për sa i përket gjëndjes së tij shëndetësore thotë vetëm që është mirë. Për të dhënë prova besueshmërie policia thotë se vizita e mjekut është kryer nën praninë e përfaqësuesve të Avokatit të Popullit.
Njoftimi i plotë: Sqarim i Policisë Tiranë
Në lidhje me një lajm të publikuar në rrjetet sociale se shtetasi me iniciale A.B., 20 vjeç, është në gjendje të rëndë shendetësore në ambientet e Komisariatit të Policisë Nr.1 ju sqarojmë se:
Shtetasi A.B., 20 vjeç, i arrestuar me datë 11.12.2020, për veprat penale ““Organizimi dhe pjesëmarrja ne grumbullime e manifestime të paligjshme”, “Kundërshtimi i punonjësit të policisë së rendit publik”, “Pengimi i qarkullimit të mjeteve të transportit”, “Prishja e qetësisë publike”, “Shkatërrimi i pronës me zjarr” dhe ”Mosbindja ndaj urdhrit të punonjësit të policisë së rendit publik” dhe ‘’Mbajtja dhe përdorimi i lëndëve plasëse dhe piroteknike’’ ndodhet në gjendje të mirë shendetësore, kjo e konfirmuar para pak minutash nga mjeku i DVP Tiranë si dhe në prezencë të dy përfaqësuesve të avokatit të popullit.
DVP Tiranë kërkon mirëkuptimin e medias që të mos publikojnë lajme të pakonfirmuara dhe fton qytetarët që të denoncojnë çdo rast të paligjshmërisë në Komisariatin Dixhital apo në numrin pa pagesë 112, duke u siguruar reagim të shpejtë e të paanshëm, kundrejt atyre që shkelin ligjin dhe cenojnë jetën e qytetarëve.
