Nga 157 milionë copë kartëmonedha të hedhura në treg, 343 prej tyre janë identifikuar si të falsifikuara gjatë vitit 2022. Sipas Bankës së Shqipërisë, hedhja në treg e monedhave të reja me elemente më të larta të sigurisë, ka ulur numrin e monedhave të falsifikuara në qarkullim.
Pavarësisht sigurisë së lartë të kartëmonedhave të reja, për të frenuar më tej këtë fenomen Banka e Shqipërisë ka nënshkruar një marrëveshje bashkëpunimi me Ministrinë e Brendshme dhe Prokurorinë e Përgjithshme. Marrëveshja u firmos nga guvernatori i BSH Gent Sejko, ministri i Brendshëm Bledi Çuçi dhe prokurori i Përgjithshëm Olsjan Cela. Kjo marrëveshje ka ardhur si masë e shtuar ndaj sigurisë pasi falsifikuesit përpiqen të ecin me hapin e teknologjive të reja për aktivitetin e tyre, ka thënë guvernatori Sejko.
Policia e Shtetit dhe Prokuroria përmes marrëveshjes së nënshkruar me Bankën e Shqipërisë synojnë të rrisin identifikimin e rasteve dhe marrjen e masave parandaluese në kohë. Ndërkohë ministri Bledi Çuçi gjatë fjalës së tij ka bërë me dije se ne policinë e shtetit është ngritur një zyrë qendrore kundër falsifikimit të monedhave.
“Sot në Policinë e Shtetit është krijuar zyra qendrore kundër falsifikimit të monedhave. Do ndihmojmë shumë në dokumentimin e sasive të konfiskuara dhe një lloj baze të dhënash për makineritë që përdoren”, u shpreh ministri Bledi Çuçi. Sa i përket monedhave metalike, sipas Bankës së Shqipërisë prerja 50 Lekë është e vetmja që rezulton e falsifikuar, me 79 copë për vitin 2022.
