Tirana ka arritur të marrë përkohësisht kreun e renditjes në Kategorinë Superiore duke mposhtur me shifrat 5-1 ekipin e Luftëtarit. Ishte një ndeshje pa shumë histori pasi pas avantazhit bardheblutë kontrolluan ndeshjen dhe nuk e patën te vështirë të merrnin tri pikët që kërkonin. Golat e shpejtë të Kobinah dhe Bathës i dhanë Tiranës pikërisht qetësinë që kërkonte në një duel të tillë që mund të komplikohej nga të rinjtë e skuadrës gjirokastrite të cilët në mesjavë ndalën Kukësin kryesues. Më pas e kishte radhën Ngo të shënonte me një gol të bukur duke mbyllur pjesën e parë me avantazh të pastër për ekipin e tij.
Në të dytën, goli i Çelës zgjoi Luftëtarin që sulmoi me shpresën se mudn të hapte ndeshjen, por një penallti dhuratë nga gjyqtari Kola solli golin e katërt bardheblu me Muçin, ndërsa më pas Batha shtoi edhe të pestin duke vulosur këtë fitore që i dha kreun skuadrës së tij.
Tirana-Luftëtari 5-1
15′ Kobinah, 17′, 74′ Batha, 36′ Ngo, 64′ Muçi / 53′ Çela
