Një djalë pesë vjeçar i bllokuar për disa ditë në një pus të thellë dhe të thatë në Afganistanin juglindor ka vdekur, thanë të premten zyrtarët talebanë. Fëmija, i quajtur Haidar, “na ka lënë përgjithmonë”, shkroi në Twitter Anas Haqqani, një këshilltar i lartë në ministrinë e brendshme.
Fëmija rrëshqiti në fund të pusit prej dheu në fshatin Shokak në provincën Zabul, rreth 400 km në jugperëndim të kryeqytetit Kabul, të martën. Ekipet e shpëtimit arritën tek ai të premten në mëngjes. Ai ishte ende gjallë kur arritën tek ai, por gjendja e tij ishte “jo e mirë” dhe ai kishte nevojë për “trajtim mjekësor direkt”, tha më herët Ahmadullah Wasiq, një zëvendës zëdhënës i qeverisë talebane.
Gjyshi i Haidar, Haji Abdul Hadi, 50 vjeç, i tha AFP se djali ra në gropë ndërsa përpiqej të “ndihmonte” të rriturit të shponin një pus të ri në fshatin e shkatërruar nga thatësira. Sipas burimeve zyrtare, fëmija ka rrëshqitur në pusin 25 metra të thellë përpara se të tërhiqej nga një litar në një thellësi rreth 10 metra, ku ka mbetur i bllokuar.
