Një ngjarje e pazakontë është regjistruar në Ugandë, teksa 7 futbollistë të skuadrës kombëtare të Eritreas u arratisën nga grumbullimi. Ngjarja ndodhi pas përfundimit të sfidës me Ugandën 3-0, e vlefshme për Kupën e Afrikës Lindore. Sipas mediave të huaja, ky nuk është incidenti i parë i këtij lloji që ndodh me këtë skuadër.
Në muajin tetor, 5 lojtarë të ekipit kombëtar U-20 të Eritresë u zhdukën nga grumbullimi kur zhvillohej kompeticioni i Kupës së Afrikës Lindore për këtë grupmoshë.
Ndërsa para 4 vitesh, dhjetë lojtarë të Eritresë refuzuan të ktheheshin në atdhe pas takimit kualifikues të Kupës së Botës 2018 me Botsvanën. Rasti tjetër është shënuar në vitin 2013, ku 15 lojtarë dhe mjeku i ekipit kombëtar kërkuan azil politik në Ugandë. Në vitin 2009 në Kenia të gjithë lojtarët e Eritresë u larguan duke lënë vetëm trajnerin dhe një zyrtar të Federatës së Futbollit të Eritresë.
