Detaje të reja dalin në dritë nga vrasja e dyfishtë që ndodhi pasditen e djeshme në fshatin Sumë, Njësia Administrative Pult të Dukagjinit.
Burime nga grupi hetimor bëjnë me dije se autorët i kanë zënë pritë babë e bir një kthesë në një zonë të pyllëzuar, afro 500 metër pa mbërritur tek banesa e djegur.
Gjokë dhe Eduard Gurra janë qëlluar me 8 plumba kallashnikovi brenda në makinë, ndërkohë që prokuroria ka marrë në pyetje familjarët e dy viktimave për të evidentuar çdo konflikt të mundshëm që ata kanë pasur kohët e fundit.
Mësohet se sot policia e Shkodrës është kthyer në vendngjarje për të parë skenën e krimit, ndërsa dyshohet se plumbat janë qëlluar nga një armë e vetme, çka nuk përjashton mundësinë që autori të ketë qenë një person i vetëm.
Veç pistës që babë e bir kishin aktivitet të tregtimit të lëndës drusore, policia ka ngritur edhe atë të konflikteve për mbjelljen e kanabis sativa, duke qenë se 57-vjeçari në 2008-ën ka qenë punonjës policie dhe së fundmi kryeplak i fshatit Bruçaj. Po verifikohet nëse ka denoncuar ndonjë rast të kultivimit të drogës dhe kjo mund të jetë bërë shkak për vrasjen.
Gjokë Gurra ishte babai i dy djemve, ndërsa djali i tij Eduarti ishte baba i dy vajzave. Ende po punohet për identifikimin e autorit/autorëve që mund të fshihen pas kësaj ngjarjeje.
