920 mln ton ushqime shpërdorohen çdo vit në planetin tonë dhe përfundojnë në koshin e mbeturinave. Me fjalë të tjera, 17% e ushqimit botëror në vitin 2019 u hodh poshtë, në kushtet kur ishte ende i konsumueshëm. Dhe në të njëjtën kohë, në vitin 2019 në Tokë 619 mln persona vuajtën nga uria. Këto janë statistikat e programit mbi ushqimin dhe ekonominë të Kombeve të Bashkuara.
Anketimi është kryer në 54 vende që janë pjesë e OKB, dhe janë vëzhguar sasitë e ushqimit në shtëpi, të restoranteve, të zinxhirit të prodhimit dhe shpërndarjes ushqimore. Rezulton se shpërdorimi më i madh verifikohet në familje, pavarësisht të ardhurave. Nga kuzhinat e konsumatorëve përfundojnë në mbeturina 11% e sasisë totale të ushqimit, në shërbimet e restoranteve 5% ndërsa në shitjen ne detaj vetëm 2%.
Sipas statistikave të KB, për çdo banor të Tokës mesatarisht konsumohen 121 kg ushqim në vit, nga të cilët 74 në shtëpi. Vendet anëtare të OKB janë zotuar që të përgjysmohet sasia e ushqimit të shpërdoruar brenda vitit 2030, objektiv ky i nënshkruar në Agenda 2030. Por OKB ngre shqetësimin se jemi ende shumë larg arritjes së objektivave.
Shkurtimi i sasisë së shpërdoruar shërben edhe për luftën ndaj kequshqyerjes, por pasojat ndjehen edhe në mjedis. Përllogaritet që rreth 10% e gazrave serë në atmosferë mbërrijnë nga prodhimi i ushqimit, përfshirë këtu kultivimin, përpunimin dhe transportin.
