Zv.ministrja e Shëndetësisë, Mira Rakacolli ka folur për lirimin e masave anti-covid. Në një aktivitet ku mori pjesë, Rakacolli tha se fokusi aktualisht është tek vaksinimi ndërsa tha se procesi i hapjes do të jetë gradual.
“Siç e kemi theksuam gjithmonë ne ndjekim me vëmendje situatën epidemiologjike, kemi një numër të qëndrueshëm të personave të shtruar në spitale. Ka vende që zbatohen masat dhe ka vende të tjera që nuk zbatohen.
Asgjë nuk shihet me shifra ditore, se do të shkonim drejt gabimeve, mos harroni që nuk shkon njeri që të vaksinohet ditën e Shën Valentinit.
Unë nuk mendoj që ajo që presim është lehtësimi i masave, ajo që presim ne është ajo që pandemia të menaxhohet si duhet. Masat shkojnë në përputhje me rastet dhe kushtet epidemiologjike”, tha Rakacolli. Aktualisht në Shqipëri vazhdon të jetë në zbatim ora policore.
Lëvizja është e kufizuar pa autorizim pas orës 00:00, ndërkohë që gjendja aktuale e infektimeve është në zbritje. Pas shpërthimit të një vale infektimesh në janar, tashmë shifrat janë në rënie, ku dje u regjistruan rreth 150 të infektuar.
