Një adoleshent i cili vuan nga kanceri po realizon “dëshirën e tij të fundit” duke ndihmuar në mbledhjen e parave për një 6-vjeçar, i cili gjithashtu vuan nga kanceri. 19-vjeçarit Rhys Langford, nga Ebbw Vale, Uells, mjekët i kanë thënë se ka vetëm disa muaj jetë. Kur lexoi për 6-vjeçarin Jacob, që jeton në të njëjtin qytet me të, ai dhuroi 1000 £ dhe krijoi një faqe për mbledhjen e fondeve. “Nëse nuk mund të bëhet asgjë për mua, unë do përpiqem të ndihmoj dhe të shpëtoj këtë djalë të vogël”- u tha Rhys prindërve të tij.
Pas përfundimit të trajtimit verën e kaluar, Rhys zbuloi këtë muaj se kanceri i ishte rikthyer dhe përhapur edhe më shumë, duke ia shuar shpresat për mbijetesë. Faqja e mbledhjes së fondeve e hapur nga ai, deri tani ka mbledhur 7,000 £ për Jacob, tha nëna e Rhys, Catherine Langford. Paratë e mbledhura nga Rhys do të shkojnë për trajtimin e ardhshëm për Jacob, i cili mund të duhet të udhëtojë në Amerikë për trajtim eksperimental që nuk është i disponueshëm në Mbretërinë e Bashkuar.
