Pistoleta me të cilën tentoi të vetëvritej 17-vjeçarja në Vlorë (ngjarje e ndodhur katër ditë më parë), është gjetur këtë të enjte nga Policia e Vlorës.
Uniformat blu bëjnë me dije se arma e zjarrit u gjet në një vend grumbullimi materialesh të ndryshme shtëpiake, pranë banesës së gjyshërve të të miturës dhe ndodhej brenda një qeseje plastike.
“Në vijim të hetimeve për ngjarjen e ndodhur më datë 14.07.2025, në lagjen “Kushtrimi”, ku një 17-vjeçare mbeti e plagosur rëndë pas tentativës për vetëvrasje me armë zjarri, u bë e mundur gjetja dhe sekuestrimi, në cilësinë e provës materiale, i armës së zjarrit pistoletë, e cila ishte hedhur në një vend grumbullimi materialesh të ndryshme shtëpiake, pranë banesës së gjyshërve të të miturës dhe ndodhej brenda një qeseje plastike”, njofton policia.
Arma e sekuestruar do t’i dërgohet Institutit të Policisë Shkencore për ekzaminime të mëtejshme, me qëllim dokumentimin e plotë të ngjarjes.
Kujtojmë se 17-vjeçarja qëlloi veten me plumb pas një konflikti familjar.
Sipas uniformave blu, adoleshentja tentoi t’i jepte fund jetës pasi u dhunua nga babai i saj, 43 vjeçari me iniciale S. S., i cili u vendos në prangat e policisë më 15 korrik, një ditë pas ngjarjes.
Ai akuzohet për veprat penale “Dhuna në familje” dhe “Shkaktimi i vetëvrasjes”.
“U arrestuan në flagrancë, për veprat penale “Dhuna në familje” dhe “Shkaktimi i vetëvrasjes”, shtetasin S. S., 43 vjeç, banues në fshatin Romës, Vlorë, pasi dyshohet se, për shkak të dhunës së ushtruar ndaj vajzës së tij të mitur, ajo ka tentuar të vetëvritet, në gjendje të rënduar psikologjike, me armë zjarri të dyshuar pistoletë”, njoftuan blutë.
Blutë nisën procedimin në gjendje të lirë për gjyshin e të miturës, 76-vjeçarin me iniciale P. H., pasi dyshohet se posedonte në mënyrë të paligjshme armën e zjarrit me të cilën ka tentuar të vetëvritet mbesa e tij.
