Shumë pushues nga Kosova, Gjermania Zvicra dhe Austria kanë zgjedhur Shqipërinë si destinacion për të kaluar pushimet verore. Shumë prej tyre kanë shfrytëzuar Aeroportin Ndërkombëtar të Kukësit. Kryeministri Edi Rama ka publikuar pamje nga aeroporti ndërsa shkruan se shumë turistë po shfrytëzojnë këtë portë të re të qiellit tonë për të kaluar pushimet në Shqipëri.

“Dhe nga Aeroporti Ndërkombëtar i Kukësit me pasagjerët jo vetëm nga Shqipëria e Kosova, por edhe turistë nga Gjermania, Zvicra dhe Austria, që shfrytëzojnë këtë portë të re të qiellit tonë për të kaluar pushimet në Shqipëri, ju uroj një fundjavë të mbarë“, shkruan Rama.

Aeroporti Ndërkombëtar i Kukësit ‘Zayed-Flatrat e Veriut’ ka një pistë prej 2.2 kilometrash dhe kullën e tij të vëzhgimit, ndërsa në pjesën e pistës, është projektuar të mbajë 3 aeroplanë njëkohësisht, ndërsa brenda një ore, 4 avionë mund të nisen nga Aeroporti i Kukësit.