Kompania Instituti i Konsulencës në Ndërtim IKN është shpallur fituese për tenderin për Shërbime inxhinierike të pavarura për zbatimin e kontratës koncesionare/PPP për rehabilitimin, operimin dhe transferimin e Aeroportit të Kukësit. Njoftimi është bërë i ditur në buletinin e APP-së, ku thuhet se në garë morën pjesë katër kompani ku tre ofertat e para ishin bashkime kompanish.
Fondi limit për këtë kontratë ishte 175. 4 milion lekë pa TVSH, dhe oferta e bërë nga kompania në fjalë IKN ka ofruar të njëjtën vlerë dhe është vlerësuar me 94.1 pikë, duke u identifikuar si oferta e suksesshme. Kompania e shpallur fituese do të monitorojë zbatimin e kontratës koncesionare të ndërtimit të aeroportit të Kukësit, duke mbikëqyrur zbatimin e punimeve.
Aeroporti i Kukësit është i dyti që po ndërtohet në vend dhe është parashikuar të funksionojë si aeroport për fluturimet low cost, nga i cili do të mund të udhëtojnë rreth 300 mijë pasagjerë në vit, siç ka deklaruar edhe Ministria e Infrastrukturës.
Për këtë vendim sipas APP nuk ka pasur ankesa, dhe në rast se kompania fituese vendos të tërhiqet nga nënshkrimi i kontratës, do t’i konfiskohet sigurimi i ofertës bazuar në ligjin “Për prokurimin publik”, i ndryshuar.
