Mediat italiane raportojnë se një 30-vjeçar shqiptarë ka shpëtuar për mrekulli gjatë një aksidenti rrugor që kishte ndodhur në aksin ku ai po udhëtonte.
Duket se fati e ka ndihmuar teksa shqiptari po udhëtonte me makinë, kur para tij kishte ndodhur një aksident.
Një furgon që drejtohej nga një kinez, ishte përmbysur në rrugë, ndërsa shqiptari mrekullisht nuk ishte përplasur.
Duke mos dashur të qëndronte në rrugë, nga frika se makinat e tjera mund ta përplasnin për vdekje, shqiptari ka vendosur të kalojë hekurat rrethues të rrugës.
Ai kishte menduar se do të haste në tokë të butë, por në fakt aty ka rrezikuar edhe më shumë jetën.
Ai ka rënë në një rrëpirë prej më shumë se 10 metrash duke përfunduar në një përrua të rrëmbyeshëm.
Fatmirësisht në vendin e ngjarjes kishte mbërritur policia dhe zjarrfikësit, duke ndërhyrë menjëherë.
Janë dashur më shumë se 2 orë që ai të nxirrej nga përroi, me disa dëmtime të vogla, por pa probleme për jetën.
Ngjarja ka ndodhur mbrëmjen e djeshme në Firence.