Një aksident i rëndë ka ndodhur mëngjesin e sotëm në autostradën “Ibrahim Rugova” ku kanë humbur jetën dy shtetase nga Shqipëria. Mësohet se ato janë Elisabeta Katiaj, nënkryetare e Dhomës së Biznesit të Diasporës Shqiptare nga Vlora, dhe Eorda Sinollari, konsulente biznesi pranë Dhomës, si pasojë e një aksidenti rrugor në Kosovë.
Aksidenti ndodhi rreth orës 07:40, ku një kamion me targa të Kosovës është përplasur me një veturë me targa të huaja.
Si pasojë e përplasjes së fortë, drejtuesja e veturës dhe pasagjerja humbën jetën, ndërsa drejtuesi i kamionit pësoi lëndime. Drejtuesja e mjetit humbi jetën në vendngjarje, ndërsa tjetra u dërgua në spital, por nuk mundi të mbijetonte.
Elisabeta Katiaj ishte një figurë e njohur në komunitetin e biznesit shqiptar dhe diasporës, e angazhuar në ndërkombëtarizimin e sipërmarrjes dhe mbështetjen e grave sipërmarrëse.
Ajo luajti rol kyç në afrimin e investitorëve të huaj dhe në nismat e Dhomës së Biznesit të Diasporës, duke promovuar projekte me ndikim për Shqipërinë dhe diasporën.
Si bashkëthemeluese e Rrjetit të Gruas së Diasporës Shqiptare, Katiaj la një trashëgimi të rëndësishme në mbështetje të barazisë gjinore dhe zhvillimit të sipërmarrjes.
