Autoriteti Kombëtar i Ushqimit ka vijuar edhe gjatë ditës së sotme inspektimin dhe monitorimin si pjesë e taskforcës antiCovid. Grupet e taskforcës këmbëngulin gjatë çdo monitorimi në biznese që të zbatohet protokolli i sigurisë, higjienizimi i ambienteve, mbajtja e detyruar e maskës në ambiente të mbyllura dhe distanca fizike, si masa kufizuese të përhapjes së virusit.
“Gjatë inspektimeve janë dhënë tri masa administrative në operatorë të biznesit ushqimor. Një masë administrative është dhënë në një subjekt për mungesë të kushteve higjieno-sanitare. Një tjetër masë është dhënë në një njësi tregtimi mishi, për tregtim të produktit mish pa vulë dhe certifikatë veterinare. Një masë e tretë është dhënë nga trupa inspektuese e AKU-së në një subjekt për therje jashtë kushteve të lejuara. Me kërkesë të dy subjekteve është bërë asgjësimi i 32,317 tonë produkte ushqimore. Referuar Planit të Marrjes së Mostrave, janë marrë 16 mostra kryesisht në fruta-perime për analizim të mbetjeve pesticide”, shprehet AKU. Autoriteti Kombëtar i Ushqimit do të vazhdojë punën pa ndëprerje në terren në garantim të sigurisë ushqimore dhe mbrojtjes së shëndetit të konsumatorit.
