Agron Shehaj ka verifikuar live firmat e formularëve të dorëzuar në PD nga Sali Berisha me kërkesën për mbledhjen e Kuvendit Kombëtar të PD, më 11 dhjetor.Ai ka shkuar në zyrën e Edi Palokës ku ndodhen dosjet me formularët e dorëzuar nga Berisha. Agron Shehaj ka hapur dokumentet dhe pasi ka shqyrtuar përmbajtjen e tyre, ka marrë në telefon numrin e vendosur aty nga qytetarët.
“Alo, si jeni, jam Agron Shehaj dhe po verifikoj nëse keni firmosur formularin për mbajtjen e Kuvendit më 11 dhjetor”, u është drejtuar ai demokratëve në telefon. Dy prej personave të pyetur nga Shehaj, konfirmuan se kishin firmosur formularët në fjalë.
Agron Shehaj: Sot verifikova personalisht firmat e dorëzuara për mbledhjen e Kuvendit në datën 11 Dhjetor në degët 5 dhe 7 në Tiranë, ku jam drejtues politik dhe i zgjedhur.
Më shumë se 56% e delegatëve të degës 7 dhe 58 % e degës 5 kanë firmosur për Kuvendin e datës 11 Dhjetor. 98% e delegatëve që kanë firmosur, me të cilët arrita të flisja, konfirmuan që kanë plotësuar formularin. Mbledhja e Kuvendit nga firmëtarët është legjitime, ndaj në respekt të vullnetit të demokratëve, do marr pjesë në Kuvend. Përplasja dhe përçarja në Partinë Demokratike zgjidhet vetëm përmes votës në Kuvend. Shmangia e ballafaqimit me anëtarët vetëm do thellojë përçarjen dhe dobësojë opozitën.
