Numri i zogjve në SHBA dhe Kanada është ulur me 29 për qind që nga viti 1970, thanë shkencëtarët, sipas të cilëve sot ka 2.9 miliardë zogj më pak se 50 vjet më parë.
Analiza e botuar në revistën ‘Science’ është përpjekja më gjithëpërfshirëse dhe ambicioze për të zbuluar se çfarë po ndodh me popullatën e shpendëve. David Yarnold, president dhe CEO i Shoqatës Nacional Audubon, tha se ishte një “krizë në shkallë të gjerë”, sipas The New York Times. Ekspertët kanë ditur prej kohësh se disa specie zogjsh janë më të prirë për zhdukje. Por një studim i ri, i bazuar në një studim të gjerë të më shumë se 500 specieve, zbulon humbje të mëdha edhe në mesin e shpendëve tradicionalisht të përhapur, siç janë krimbat dhe harabelat. Ndoshta ka shumë shkaqe, më të rëndësishmet janë humbja e habitatit dhe përdorimi i shtuar i pesticideve.
Kevin Gaston, një biolog në Universitetin e Exeter, thotë se njohuri të reja sinjalizojnë diçka edhe më të madhe. “Kjo është një humbje e natyrës. Speciet e zakonshme të shpendëve janë jetike për ekosistemin, kontrollin e dëmtuesve, pllenimin e luleve, përhapjen e farave dhe restaurimin e pyjeve. Kur këta zogj janë zhdukur, habitatet e tyre të mëparshme zakonisht nuk janë më të njëjtat”, tha ai.
Një ekip studiuesish nga universitete, agjenci qeveritare dhe organizata jofitimprurëse bashkëpunuan në një studim të ri duke kombinuar metodat e vjetra dhe të reja të numërimit të shpendëve, transmeton KosovaPress. Për dekada të tëra, ornitologët profesionistë janë ndihmuar nga një ushtri e vëzhguesve të përkushtuar amatorë, të cilët kanë hedhur vëzhgimet e tyre në bazat e të dhënave dhe kanë ndihmuar në kryerjen e sondazheve mbi popullsinë e shpendëve çdo vit. Në një studim të ri, studiuesit iu drejtuan këtyre të dhënave për të vlerësuar një popullsi prej 529 specie nga 2006 deri në 2015.
Këto vlerësime përfshijnë 76 për qind të të gjitha specieve të shpendëve në SHBA dhe Kanada, por përfaqësojnë pothuajse tërë popullsinë e shpendëve. Speciet për të cilat kishte të dhëna të pamjaftueshme për t’u vlerësuar janë zakonisht të pakta. Studiuesit më pas përdorën të dhënat e vëzhguesve të shpendëve për të vlerësuar popullsinë e secilës specie që nga viti 1970, viti më i hershëm për të cilin janë të disponueshme të dhëna të besueshme.
“Ne u befasuam nga rezultatet. Jo vetëm që numri i specieve të shpendëve të rrezikuar po bie, por pothuajse të gjithë të tjerët”, tha Kenneth V. Rosenberg, një shkencëtar i mjedisit në Universitetin Cornell dhe American Conservancy Bird dhe autor kryesor i studimit. Në mesin e goditjeve më të forta janë shpendët me kokë të zezë, popullsia e të cilëve ka rënë në 617 milionë ose 440 milionë më pak se dikur.
