Ka nisur me një incident tryeza e thirrur nga OSBE për Forumin për Zhvillimin e Medias. Disa banore të Unazës së Re, mes tyre edhe Enxhi Turtulli, anëtare e forumit të PD, me pankarta në duar kanë kërkuar largimin e ambasadorit të OSBE në Shqipëri Bernd Borchardt nga tryeza por dhe Shqipëria.
Ato kanë thirrur njëzëri ‘Borchardt shame on you, Ik nga Shqipëria’. Ambasadori i OSBE ka zgjedhur të injorojë thirrjet e tyre duke vijuar me rendin e ditë.
“Do t’i injoroj”, është shprehur ai teksa vijuar fjalën e tij për problematikat e medias në vend.
Turtulli është mjaft aktive në protestat dhe tubimet e organizuara nga opozita. Në profilin e saj në rrjetet sociale ajo shfaqet krah liderit demokrat Lulzim Basha, dhe ish-kryeministrit Sali Berisha. Ajo ka qenë mjaft e angazhuar edhe në protestën e Unazës së Re, krah ish-deputetit demokrat Klevis Balliu.
