Pushteti vendor në Durrës ka rihapur mbrëmjen e kaluar pa ndonjë njoftim zyrtar ri aplikimet për qytetarët banesat e të cilëve u dëmtuan nga tërmeti i 26 nëntorit 2019 dhe janë klasifikuar si të dëmtuara me pasoja të lehta dhe të mesme (DS1, DS2 dhe DS3). Ndërkohë që radhë të gjata janë krijuar në ambientet e Prefekturës së Durrësit sepse aplikimet do zgjasin vetëm 24 orë.
Në pamjet e siguruara nga Fax News, shihet se janë krijuar radhë të gjata, të qytetarëve të cilët kërkojnë të riaplikojnë për banesë. Një qytetar shprehet për Fax News se ka mbërritur aty që prej orës 5 të mëngjesit, dhe ende nuk ka asnjë shpresë se çfarë do të ndodhë.
“Kam ardhur në orën 5 të mëngjesit po rrimë këtu kot me kot dhe nuk kemi asnjë shpresë se çfarë do të bëhet.”- tha qytetari i indinjuar. Megjithëse jemi në një kohë pandemie, ku nuk lejohet grumbullmimi i më shumë se 10 personave, duket se pushteti vendor nuk e ka marrë parasysh fluksin e qytetarëve, duke rihapur aplikimet për vetëm 24 orë.
