Pas marrjes së çmimit të parë në Festivalin e 58 të Këngës në RTSH, këngëtarja Arilena Ara tha se ka një peshë më të madhe, atë të përfaqësimit të Shqipërisë në Eurovizion. Me këngën “Shaj”, ajo do të përfaqësojë Shqipërinë në Festivalin Europian të Këngës “Eurosong 2020”. Në këtë festival, Arilena e mori kupën nga Jonida Maliqi, e cila ishte fituese e të njëjtit çmim, një vit më parë. “Nuk e kisha menduar asnjëherë. Më emocion kam tani sesa para publikut, se po shikoj gjithë këto kamera, gjithë këto njerëz, e nuk di çfarë kam bërë për ta merituar. Jam shumë e emocionuar, jam shumë e lumtur. Dhashë gjithë shpirtin, gjithë muzikën time dhe u përpoqa të artikuloja çdo ndjesi e emocion timin, jam e lumtur që ia arrita dhe që publiku e vlerësoi fitoren time, qoftë dhe juria.
Nuk e di tani, tani kam një peshë më të fortë dhe të fuqishme, tani kam një përgjegjësi më të madhe, nuk e di a jam gati të për të përfaqësuar një shtet, të përfaqësoj Shqipërinë në Eurovizon. Por jam shumë e lumtur, zemra po më del nga vendi. Por jam e kontrolluar, di çfarë them. Falenderoj publikun që më rriti mua dhe që më solli këtu ku jam sot”, u shpreh këngëtarja. Me këngën “Shaj”, baladën që i mbajti të gjithë mbërthyer, bukuroshja do të përfaqësojë Shqipërinë në Festivalin Europian të Këngës “Eurosong 2020”.
