Aleatët republikanë të Donald Trump në Dhomën e Përfaqësuesve po përpiqen ta mbrojnë ish presidentin nga kërcënimet ligjore që i kanosen. Pas paralajmërimeve të tij se mund të arrestohej, ata përdorën shumicën e tyre në Dhomën e Përfaqësuesve për të kërkuar dëshminë e Prokurorit të Qarkut të Manhattan, Alvin Bragg dhe për të penguar hetimin e tij në lidhje me pagesën e supozuar, të bërë yllit të filmave për të rritur Stormy Daniels përpara zgjedhjeve të 2016-ës për të heshtur mbi aferën e pretenduar mes tyre.
Ndërkohë, tabulatet e komunikimeve mes Daniels dhe një avokati që aktualisht po përfaqëson ish-presidentin Donald Trump janë dorëzuar tashmë në zyrën e Bragg. Kjo ngre mundësinë që avokati i ish kreut te shtetit, Joe Tacopina, të detyrohet të heqë dorë nga mbrojtja e tij.
“Është raportuar se ata kanë ndërmend të arrestojnë ish presidentin Trump. Nëse diçka e tillë ndodh vërtet, atëherë të gjithë do ta dinë se kjo bëhet që emri I tij të mos jetë në fletën e votimit.”– tha Andres Manuel Lopez Obrador, president i Meksikës.
Obrador, një populist i majtë, ka një marrëdhënie të përzemërt me Trumpin pavarësisht retorikës së tij të zjarrtë, e ishte një nga liderët e fundit botërore që ia uroi fitoren në zgjedhjen pasardhësit të tij, Joe Biden. Kjo e Donald Trumpit do të ishte kjo aktakuza e parë në historinë e SHBA-së kundër një ish-presidenti. Jo për shkak të një hapi të gabuar, por për shkak të një tentative për fshehjen e fakteve. Pagesa e parave për të heshtur në është antiligjore në SHBA.
Por vepra penale e pandehur është se shuma nuk është deklaruar në bilancet e Trumpit, thotë ish-prokurori, Matthew Galluzzo.”Aspekti më i rëndësishëm për hetuesit është pse shuma është deklaruar gabimisht – jo si para për të heshtur, por si një shpenzim tjetër për organizatën e Trumpit.
E kjo mund të jetë një shkelje e vogël ligjore, por edhe ndonjë vepër penale,” shprehet ai. Trumpi i ftoi mbështetësit e tij që të protestojnë, por pjesëmarrja në protestën e parë ishte e ulët. Megjithatë, përpara gjykatës një republikan i ri paralajmëroi se mund të ketë kaos. Top Channel
