Greqia, Qiproja dhe Izraeli kanë firmosur ditën e sotme një marrëveshje të përbashkët për projektin e gazsjellësit “East Med”. Ky projekt parashikon furnizimin me deri në 12 miliardë metra kub gaz, nga lindja e Mesdheut drejt Evropës. Mirëpo kjo marrëveshje është kundërshtuar nga Turqia. Kjo e fundit ka qenë shumë aktive në zhvillimin e rrugëve të reja të gazit për Evropën dhe sapo kishte arritur marrëveshje detare me Libinë, mbi një zonë të pasur me gaz në det.
Tubacionet e projektit “East Med” parashikohet të zgjaten rreth 2,000 kilometra nga Izraeli, Qiproja, Greqia e më pas drejt Italisë. Projekti do të kërkojë një investim prej rreth 6-7 miliardë dollarësh dhe nëse nis ndërtimin në vitin 2022 do të përmbyllet në vitin 2025. Projekti në fjalë ka ngjallur mosmarrëveshje të re mes Qipros dhe Turqisë, e cila ka pjesën veriore të ishullit mesdhetar dhe pretendon pasuritë detare përreth.
