Ministrja e Shëndetësisë, Ogerta Manastirliu ka deklaruar se gjatë ditës së sotme në vendin tonë numri i personave të vaksinuar do të shkojë në 300 mijë. Në një intervistë në News24, Manastirliu u shpreh se sipas planifikimeve deri në fund të majit shifra e të vaksinuarve do të arrijë në 500 mijë.
“Kemi përfunduar grup moshat +70 dhe +80. Sot do të arrijmë në 300 mijë të vaksinuar. Deri në fund të majit kemi planifikuar 500 mijë. Ne mund të përballojmë edhe më shumë vaksinime në ditë. Qeveria shqiptare ka kontraktuar mbi 2 mln doza vaksinash”, u shpreh Manastirliu.
Ndërkohë teksa është pyetur se çfarë do ta përkeqësonte situatën e pandemisë, ministrja tha se pandemia Covid-19 ka shumë të panjohura, ndërsa theksoi se variantet e reja janë ato që mund të sjellin rritje të infektueshmërisë.
“Ka shumë të panjohura në një pandemi. Ajo që na ka mësuar pandemia është që variantet e reja mund të sjellin një rritje të infektueshmërisë. Por situata e epidemisë kontrollohet vetëm nëse i besohet autoriteteve. Ne kemi qenë shumë të kujdesshëm në hapat që kemi ndërmarrë. Ne jemi në një situatë epidemie, nuk duhet ulur vigjilenca. Duhet besuar tek autoritetet, duhen ndjekur masat dhe duhet bërë vaksinimi masiv”.
