Policia e Kurbinit ka dalë me një njoftim zyrtar për atentatin e ndodhur mbrëmjen e sotme në Milot, në qendër të qytetit, në sheshpushimin e një pallati, ku mbeti i vrarë Klisman Preçi dhe u plagos Ylli Brahimi.
Policia thotë se, Klisman Preçi sapo kishte ardhur nga jashtë shtetit dhe ishte në makinë së bashku me Yli Brahimin.
Ata, sipas policisë janë qëlluar me breshëri automatiku, sapo kishin dalë nga një automjet “Land Chrysler”.
Nuk ka asnjë të dhënë për autorët, por pak minuta pas ngjarjes, në zonën e Fush-Krujës është gjetur një automjet i djegur.
Njoftimi
Në qytet Milot, në sheshpushimin e një pallati, rreth orës 21:00, është qëlluar me armë zjarri në drejtim të automjetit tip fuoristradë “Land Chrysler”, brenda të cilit ndodheshin shtetasit K. P., 28 vjeç dhe Y. B., 46 vjeç, banues në Kurbin, të cilët janë dërguar në Spitalin e Traumës, në Tiranë. Shtetasi K. P. ka ndërruar jetë.
Në vendngjarje kanë shkuar menjëherë forca të shumta policie dhe grupi hetimor.
Gjithashtu, nga forcat policore të Komisariateve të Policisë Kurbin dhe Lezhë, me mbështetje edhe nga grupet e FNSH Shkodër, po bëhet krehja e zonës dhe janë ngritur pika kontrolli, me qëllim kapjen e autorit/ëve.
Janë ngritur pika kontrolli në Rrugën e Kombit, në drejtim të Matit, të Lezhës, të Tiranës dhe të Krujës.
Në fshatin Gramëz, rrethi Krujë, është konstatuar duke u djegur një automjet, që dyshohet se është automjeti i përdorur nga autori/ët për kryerjen e kësaj ngjarjeje kriminale. Nga kqyrja paraprake, brenda tij, janë gjetur 2 armë zjarri kallashnikovë.
Grupi hetimor, nën drejtimin e Prokurorisë së Rrethit Gjyqësor Kurbin, vazhdon veprimet hetimore, duke administruar çdo provë, pamje filmike, informacion si dhe dëshmi, për zbardhjen e plotë të rrethanave të ngjarjes.
