Me gjithë paralajmërimet për motin e keq e detin e trazuar deri më tani nuk është anuluar asnjë udhëtim me tragetet e linjës nga Italia në Shqipëri e anasjelltas. Në portalin e Autoritetit të Sistemit Portual Italian konfirmohet se mëngjesin e datës 6 janar 2020 në portin e Barit në orën 7 të mëngjesit ka mbërritur nga Durrësi anija AF Francesca dhe në orën 8.00 ka mbërritur po nga Durrësi në Bari anija Rigel II.
Gjithashtu në orën 12.41 të datës 6 janar është nisur nga Porti i Barit drejt Durrësit anija AF, Francesca dhe në orën 23.00 deri më tani është konfirmuar nisja e tragetit RIGEL II nga Bari drejt Durrësit. Asnjë anulim apo vonesë në nisje nuk është regjistruar dhe në portin e Brindizit. Anija ST.Damian e nisur sot më datë 6 janar nga Porti i Vlorës, pritet të mbërrijë në Brindizi në orarin e përcaktuar ora 20.00.
Po ashtu nuk ka vonesa dhe në mbërritjen nga Vlora në Brindizi i anijes Prince. Festat e fundvitit kanë sjellë një rritje të fluksit të udhëtarëve në portet lidhëse mes Shqipërisë e Italisë. Shumica e tyre janë emigrantë që janë kthyer për t’i kaluar pushimet pranë familjeve të tyre në Shqipëri.
Fakti se deri më tani nuk ka anulime e vonesa në lëvizjen e trageteve është një lajm i mirë për ta, duke u lejuar të rikthehen në vendet ku jetojnë e punojnë pa vonesat e paparashikueshme. Ndërkohë janë pezulluar gjatë ditës së sotme udhëtimet me tragetet e linjës e aliskafët që lidhin ishujt Eolie në Siçili.
