Sekretari i Jashtëm Britanik, Dominic Raab në një deklaratë për mediat tha se shënjestrimi i vendeve kulturore në Iran nga Amerika shkel konventat ndërkombëtare të luftës, duke bërë një qortim të nënkuptuar ndaj kërcënimit të Trump për të bombarduar vendet e trashëgimisë së mbrojtur kulturore në Iran.
Dominic Raab: “Ne jemi shumë të qartë që vendet kulturore mbrohen nga ligji ndërkombëtar dhe ne do të presim që ato të respektohen.” Ministri i lartë britanik foli pasi presidenti amerikan Donald Trump tha se ai do të bombardonte 52 vende kulturore iraniane nëse Irani do të hakmerret për vrasjen e gjeneralit Qassem Suleimani, disa prej tyre në një nivel shumë të lartë dhe të rëndësishëm për Iranin dhe kulturën iraniane. Në deklaratën e tij Trump nënvizoi se numri i vendeve të zgjedhura 52, përputhet me numrin e pengjeve amerikane të mbajtur nga Irani në 1979, kur një grup diplomatësh dhe qytetarë amerikanë u arrestuan për 444 ditë në Teheran. Pavarësisht reagimeve që mori, Trump e përsëriti prap kërcënimin të dielën.
Donald Trump: “Ata lejohen të vrasin njerëzit tanë, ata lejohen të torturojnë dhe të sakatojnë popullin tonë, atyre u lejohet të përdorin bomba në rrugë dhe të hedhin në erë njerëzit tanë, dhe ne nuk lejohemi të prekim vendet e tyre kulturore? Nuk funksionon kështu.” Raab foli menjëherë pas një takimi të ministrave të lartë britanik, të kryesuar nga kryeministri, Boris Johnson, për të diskutuar krizën e Iranit. /Ora News.tv/
