Ditën e djeshme FNSH dhe RENEA organizuan një operacion për kapjen e Klement Balilit në Sarandë, mirëpo nuk arritën të vinin dot në pranga Eskobarin e Ballkanit.
Burime bëjnë me dije se vetmi person që u arrestua nga Policia nën akuzën e trafikut të lëndëve narkotike është Abedin (Petro) Kuci.
Ky nuk është një emër i panjohur për policinë, pasi dhe më herët është arrestuar si pjesë e një grupi të trafikut të drogërave. Arrestimi i tij është kryer në vitin 2016-të.
Kuçi ka qenë pjesë e grupit kriminal të Odise Vervofshit nga Durrësi, që për shkak të konfliktit për lëndën narkotike, vrau dhe dogji në makinë dy persona, Shaban Babasin dhe Albert Kasallën.
Ndërkohë që për operacionin e së dielës në 12 qytete të vendit, sipas ministrit Fatmir Xhafaj janë arrestuar 27 persona, detajet për të cilët do të jepen pas disa minutash në një konferencë nga Policia e Shtetit.
