Teksa kaloi fundjavën pa ndeshje, ku ishte programuar “El Classico” ndaj Realit, tashmë i shtyrë për në dhjetor, Barcelona u kthye me një fitore të madhe në La Liga.
Në shtëpi ndaj Vajadolidit, ekipi i Valverdes fitoi pastër me shifrat 5-1. Që në minutën e dytë, ishte mbrojtësi Lengle që zhbllokoi ndeshjen.
Gjithsesi, miqtë reaguan në minutën e 15-të, dhe në një top që mbeti në zonë, ishte Kiko Olivas që e shtyu në rrjetë për të gjetur barazimin. Ky gol vetëm sa “tërboi” katalanasit, dhe kaluan sërish në avantazh me Vidalin në të 29-tën, pas një asisti fantastik të Mesit.
Dy golat e tjerë, ishte pikërisht radha e “pleshtit” për t’i shënuar. Goli i tretë për Barçën, në të 34-tën, ishte një perlë nga Mesi, direkt nga goditja e dënimit. Argjentinasi shënoi edhe në minutën e 75-të, ku pasi depërtoi brenda zone, nuk u mendua dy herë, dhe me të majtën shënoi të dytin personal.
Pati kohë edhe për një gol të Luis Suarez në të 77-tën, me uruguaianin që sërish mori një pasim fantastik nga Mesi, dhe vetëm me portierin nuk e pati të vështirë të shënojë. Me këtë fitore, Barça merr vendin e parë në Spanjë me 22 pikë, dhe me ndeshjen ndaj Realit për të zhvilluar.
