“Në rrafshin e reformës fiskale, ne i qëndrojmë me vendosmëri angazhimit tonë për taksën e sheshtë 9%”, deklaroi sot Kryetari i PD-së Lulzim Basha ne një takim me përfaqësues të Bashkimit të Prodhuesve Shqiptarë.
Basha, shpalosi detajet e programit, në veçanti atij ekonomik dhe efektet që do të ketë ai për biznesin në përgjithësi e për prodhuesit shqiptar në veçanti.
“Në rrafshin e reformës fiskale, ne i qëndrojmë me vendosmëri angazhimit tonë për taksën e sheshtë 9%. Sikundër, uljen e kontributeve shoqërore në 18%, pra, 9+9 duke zbatuar kështu parimin e taksës së sheshtë si një parim që do të nxisë rritjen ekonomike, do të nxisë punësimin, por po kështu do të nxisë transparencën dhe do të luftojë informalitetit dhe duke çuar në një skenar të tre palët fitojnë.
Sipërmarrjet shqiptare në radhë të parë, është një ndihmë e konsiderueshme financiare, është në fakt një akt i cili lë në xhepat dhe në kontot tuaja një pjesë të parave tuaja, se nuk është ndihmë, është thjeshtë mos t’ju fusim dorën në xhep aq thellë saç u është futur në këto 8 vite”, tha ai
Në vijim, Basha shtoi se në këtë mënyrë ju keni një stimulues për të stabilizuar gjendjen ekonomike e cila ka qenë e vështirë, është e vështirësuar edhe më shumë këto vitet e fundit.
“Punësimi si objektiv kryesor ju jeni dhe ne besojmë se me të gjitha hapat që do të hidhen rezultati përfundimtar në krye të katër viteve do të jetë hapja e të paktën 110 mijë vendeve të reja të punës për ekonominë shqiptare në të gjitha sektorët, jo vetëm në sektorin e prodhimit. Dhe pa diskutim që dhe shteti do të fitojë dhe ata që bëjnë sikur nuk e kuptojnë apo e shesin si paradoks duhet ta kenë fare të qartë; taksa 15% në tërësi ambienti fiskal, klima e tmerrshme e krijuar kundër biznesit ka çuar në skenarin më të mirë uljen e fitimeve të biznesit, në skenarin më të keq falimentimin e biznesit. Kur biznesit i ulen fitimet, edhe arka e shtetit është bosh.
Po kaq bosh dhe më bosh është në qoftë se biznesi falimenton. Ndërsa me fuqizimin e biznesit përfitojnë edhe të punësuarit, rritet dhe konsumi, përfiton dhe arka e shtetit. Dhe ky është fituesi i tretë i skemës, i angazhimit që ne ndërmarrim në fushën fiskale. Fiton sipërmarrja, fitojnë të punësuarit, hapen vende të reja pune, pa diskutim përfiton dhe arka e shtetit e cila, buxheti i shtetit, të ardhurat publike të cilat sigurisht duhet të destinohen me mençuri, me zgjuarsi për t’u përballur edhe me sfidat aktuale, por edhe për të mbështetur më tej zhvillimin ekonomik”, tha Basha
Basha tregoi edhe angazhimet e tij sa i përket aspektit fiskal, ku sipas tij fiton biznesi, por fiton edhe shteti.
Ai përsëriti edhe njëherë premtimin për heqjen e taksës Rama mbi karburantit dhe një sërë masash të tjera që do i vijnë në ndihmë qytetarëve dhe biznesit.
“Taksa e sheshtë 9%, kontributet shoqërore 18%, ulja e çmimit të karburantit, e patë besoj studimin e fundit, ju nuk jeni habitur, as ne nuk jemi habitur sepse ne kemi 3-4 vite që e kemi betejë të përditshme por shumë kush mund të jetë habitur kur e ka parë Shqipërinë në krye të tre vendeve të botës për çmimin e karburantit, krahë për krahë Singaporit dhe Suedisë.
Ulja e çmimit të karburantit do të vijë nëpërmjet eleminimit të taksës Rama, 240 lekë të vjetra, 24 lekë të reja për çdo litër, taksë e cila u aplikua, vit pas viti që nga vitit 2014 dhe 2015 dhe që e bëri karburantin shqiptar më të shtrenjtin në Ballkan, në Europë, dhe ndër më të shtrenjtët në botë”, tha ai.
Basha shtoi se pa diskutim një sërë probleme të tjera që ju keni ngritur kanë marrë zgjidhje në angazhimet tona ku është dhe gangrena e stërzgjatur e rimbursimeve të TVSH-së, që prej absolutisht çdo sektor dhe në veçanti sektorin e prodhimit.
“Të gjitha këto do të ndodhin përmes lehtësimit të bazës ligjore, përmes përmbledhës së të gjitha rregullave në një kod të thjeshtë tatimor, përmes eliminimit të një numri shumë të madh autorizimesh, lejesh, licencash, ku sot mbi 1000 zyrtarë të shtetit kanë vulë dhe firmë dhe do të kalosh nga 1 mijë zyrtarë të shtetit me vulë dhe me firmë, por para se të ecësh apo të hedhësh një hap përpara në sipërmarrje, në biznes apo edhe për qytetarin e thjeshtë për të ndërmarrë një akt të veçantë që ka lidhje me jetën e tij apo me jetën e saj të përditshme.
Pjesë e kësaj paketë, nuk dua të zgjatëm me detaje sepse mund të jetë pjesë e bashkëbisedimit është edhe reforma tërësore e inspektoriateve. Bashkërisht kemi diskutuar edhe kur kam qenë në ambiente e juaja kam parë se si inspektoriatet janë kthyer në një gangrenë e cila vetëm merr kohë, energji, krijon stres dhe është një burim i pashtershëm ryshfeti që rëndon xhepat tuaja dhe pastaj natyrisht edhe në xhepat e atyre që ju punësoni dhe në kurrizin tuaj, në shumicën e shqiptarëve dhe lulëzon pra një nivel korrupsioni i cili sipas të gjitha të dhënave që kemi parë ka shkuar nga viti në vit lart e më lart”, tha ai.
Po ashtu, Basha tha se “një faturë korrupsioni që po të shohim vetëm konstatimet e KLSH-së shkon 7.2 miliardë euro për këtë periudhë 7-vjeçare, 7 vjet e gjysmë”.
“Ndoshta qytetarët e thjeshtë e kanë të vështirë ta kuptojnë se çfarë do të thotë kjo, por ju si sipërmarrës e kuptoni se për çfarë bëhet fjalë. Para që mund të kishin shkuar për zhvillimin e infrastrukturës, për investime të reja në infrastrukturë ku siç e dini këto 8-vite nuk ka pasur një investim serioz në infrastrukturë. Para që mund të kishin shkuar për të ndihmuar.
Duke filluar me infrastrukturën e autostradës Tiranë-Durrës ku akoma qelbën kanalizimet e ujërave të zeza, furnizimi me ujë, rrugët e aksesit dhe ku janë faktikisht 40% apo 50% e taksapaguesve shqiptarë në atë autostradë. Për të mos folur pastaj për infrastrukturën në tërësi, etj. Pra, po kthehem edhe njëherë tek një nga burimet e korrupsionit që janë inspektoriatet. Ne do të vendosim një moratorium 12 mujor. Gjatë kësaj kohe do të bëhet reforma totale sipas standardeve europiane, plotësisht e mundur. Mjafton të shohim si e kanë bërë vendet e rajonit, vendet kufitare me ne. Nuk ka nevojë të shkojmë në vendet e Bashkimit Europian. Rezultati i kësaj reforme do të jetë që njësoj si më standardin europian që po aplikohet edhe në Ballkan 7 deri në 10% e biznesit kontrollohet çdo vit, sipas analizës së riskut”, tha ai.
Nga ana e saj, ish- deputetja e PD-së Jorida Tabaku tha se “ne kemi një reformë të plotë derregulluese me parimin bazë biznesi në qendër jo shteti, roli i vogël i shtetit dhe kjo merr parasysh mbi lehtësimin e 100 procedurave të cilat do të bëjnë të mundur që në derën tënde që kur merr lejen e kapanonit dhe deri kur e nxjerr produktin të kesh lehtësinë maksimale dhe të mos kesh asnjë zyrtar shteti që vjen dhe të pengon.
U përmend dialogu me biznesin, 3 instrumente kemi ndërmend që të ngremë. E para, kodi tatimor që përfshin të gjithë legjislacionin fiskal. 60-të ndryshime fiskale dhe 170-të urdhra ministrash ka pasur në 8 vite. Do të heqim diskrecionin që i ka dhënë qeveria ministrave”.
