Kryeministri Edi Rama ka publikuar një video ku shfaqet kreu i PD-së, Lulzim Basha teksa gatuan dhe mbi tiganin dhe pjatat bosh shfaqen disa nga pikat e programit të tij ekonomik. “Ai momenti kur tigani është në zjarr dhe peshku në det…”, shprehet Rama krahas videos të publikuar në rrjetet sociale.
“9% taksë e sheshtë, ulje e çmimit të energjisë dhe karburanteve, ulje në 18 % e sigurimeve shoqërore dhe rritje e pensioneve çdo vit 5 %, 100 milionë euro në vit fermerëve në dorë, 110 000 vende të reja pune, dyfishim i ndihmës ekonomike për familjet në nevojë, dyfishimi i të ardhurave për frymë, 15% më shumë të huaj në vit, rritje e pagës minimale në 36 000 lekë në muaj, 5 000 bursa sociale, bonus për foshnjet 3 000 lekë në muaj, 900 euro për çdo specializant, leptope falas në çdo shtëpi, korrupsion zero, krim zero, problem zero”, janë disa nga pikat e planit ekonomik të propozuar nga PD.
