Kryetari i Partisë Demokratike Lulzim Basha ka mbajtur sot fjalën e tij në Kuvend, duke lëshuar një sërë akuzash ndaj qeverisë së kryeministrit Edi Rama. Sipas Bashës, Shqipëria ka arritur disa rekorde të zeza në tetë vite të qeverisjes socialiste, nga niveli i korrupsionit, te krimi i organizuar dhe numri i kërkesave për azil. Basha tha se Rama duhet të ishte para drejtësisë, por sot “fryn gjoksin” dhe “mendon çdo gjë për mënyrat se si të mos lëshojë pushtetin”.
Pjesë nga fjala e Bashës: Zonja dhe zotërinj, të dashur bashkëqytetarë. Ky episod banal nga përfaqësues të kësaj pakice banale është vetëm një provë e një fakti të njohur ndërkombëtarisht dhe botërisht. Demokracia nuk është në krizë, ajo ka vdekur në shtyllat e saj kryesore. Në themelin e saj që janë zgjedhjet e lira. Kushdo që është ngritur në këtë foltore në këto tre dekada, ka borxhet dhe mëkatet e veta, por ekzekutori i fundit është ai që foli para meje. Provë e kësaj është fjalimi që mbajti pas dy mandateve të dështuara.
Është deliri për të fryrë gjoksin përballë dështimit me pasoja tragjike dhe përballë paaftësisë për të menduar qoftë edhe një çast të vetëm përveç mënyrës si të mos lëshojë pushtetin e marrë në mënyrë të paligjshme. Ky njeri nuk do të ishte sot këtu duke treguar përralla, por do të ishte duke u marrë me avokatët e tij mbrojtës se do të kishte punë me drejtësinë për çfarë i ka bërë vendit së bashku me ortakët e tij.
Askush në bilancin e tij të zi nuk do të kishte shansin të ishte më në foltore, për gënjeshtra të reja dhe dështime të vjetra. Sigurisht ai që është ulur para meje do të thotë që gjërat po shkojnë mirë dhe këto që unë shpreh janë pjesë e lojës së vjetër pozitë-opozitë e me radhë. Por a është e vërtetë kjo? A është produkt i nxirjes siç thotë ai nga opozita. Sipas Eurostat shqiptarët kanë pagën më të ulët dhe fuqinë blerëse më të vogël në europë, nga eurostat vijnë edhe shifrat për eksodin masivi, me të cilin ke konkurruar denjësisht me Assad-in e Sirisë, Ky është realiteti.
Në vend që të ulni kokën dhe të kërkoni ndjesë keni pacipësinë për t’i rënë gjoksit. Të paktën këtë t’ua kishit kursye njerëzve. Korrupsioni është një tjetër thagmë e juaja. Nga DASH Shqipëria cilësohet tashmë si vendi më i korruptuar i Ballkanit, ndërsa TI e konsideron në nivelin e kapjes së shtetit. BB dhe BERZH të rendisin të dytin në botë pas Zambias për nivelin e rryshfetit.
