Futbolli italian është me pushime për disa ditë, por në Arabinë Saudite është thuajse gjithçka gati për edicionin e 31-të të Superkupës së Italisë. Një trofe, që do të diskutohet mes Juventusit dhe Milanit më 16 janar, në “King Abdullah Sports City Stadium”, në Geda.
Liga ka bërë të ditur se “Sela Sport”, partneri për organizimin e Superkupës së Italisë 2018/2019, ka hedhur në treg biletat e kësaj ndeshjeje dhe interesimi është i jashtëzakonshëm, duke parë që tashmë janë zënë 50000 vende. Biletat shiten “online”, por duhet pasur shumë kujdes, sepse në disa sektorë të stadiumit biletat shiten vetëm për burrat, kështu që ata që janë të shoqëruar nuk mund të shkojnë aty.
Kategoritë e biletave janë dy. Në vendet më pranë terrenit të lojës nuk ka bileta për femrat, që mund të ulen vetëm në sektorët “Family”, të ndarë në “Gold”, “Silver” dhe “Upper 1,2”. Por edhe në këta sektorë ka kufizime: femrat nga Arabia Saudite mund të ulen në këto vende vetëm nëse janë të shoqëruara nga një mashkull. Kufizime ka edhe për femrat tifoze të huaja, që duhet t’i përshtaten vendit me veshjen tradicionale arabe. Kjo nuk është diçka e re në këtë vend, por me siguri që këto rregulla për tifozet femra do të sjellin polemika në Itali
