Duke startuar nga muaji i parë i vitit 2020, moderatorja e njohur Fjoralba Ponari do të “braktisë” “Orën e Tiranës” për të nisur një angazhim të ri. “Ora e Tiranës” është një program i cili promovon aktivitetet artistike, sociale e sportive të kryeqytetit.
Pasditen e sotme, e ftuar në “Ftesë në 5”, Fjoralba zbuloi se së shpejti ajo do të moderojë një projekt të ri që do të nisë në Top Channel. Bëhet fjalë për “Jeho”, i cili është një festival që ka në fokus të rinj të talentuar në muzikë. Mendohet që “Jeho” do të nisë transmetimin në fund të janarit. Ndër të tjera, Fjoralba tha se ekrani ka një datë skadence, dhe për këtë arsye, ajo nuk e sheh veten shumë gjatë në rolin e moderatores.
“Unë televizionin nuk e shoh për shumë gjatë si imazh, realisht… por nuk dua të shkëputem nga bota e medias. Ndoshta ndonjë produksion më vonë, nuk i dihet. Emocionit të televizionit nuk dua t’i shkëputem”, tha ajo, por shtoi se profesionin e saj si stomatologe nuk ka dëshirë ta lërë në asnjë moment.
