Kosova dhe mbarë kombi shqiptar humbi të premten “bilbilin” e këngës qytetare, Nexhmije Pagarusha. E shkolluar për kanto në Beograd, Pagarusha këndoi në shumë koncerte në vende të ndryshme të botës, duke e bërë Kosovën të njohur në arenën ndërkombëtare, edhe atëherë kur nuk ishte shtet. Me zërin e saj të fuqishëm, ajo u dhuroi emocione të shumta bashkatdhetarëve të saj, duk ua lehtësuar sadopak jetën e vështirë nën sundimin represiv serb.
Gjatë gjithë karrierës së saj, Paragusha refuzoi të këndojë në gjuhën serbe. Madje ajo braktisi skenën gjatë një koncerti në Maqedoni, kur iu kërkua me ngulm të këndojë në serbisht. Gjatë viteve të rinisë, Nexhmija këndoi arie të njohura të Betovenit, Verdit etj.
Kolegët e kujtojnë për korrektesën e saj. Ajo nuk vonohej asnjëherë, as në prova. Gjatë gjithë karrierës së saj, Pagarusha ka kënduar mbi 150 këngë, ku më të njohurat janë “Baresha” dhe “E dehur jam”. Nexhmija është krahasuar me yjet më të mëdha botërore, si këngëtaren franceze Zhyliet Greko. Veç këngës, Paragusha ka pasur pasion edhe aktrimin. Ajo ka luajtur në shumë filma, dhe është vlerësuar nga regjisorët për nivelin e lartë të interpretimit.
Frika më e madhe e Pagarushës ishte udhëtimi me avion. Idhulli i saj i përjetshëm ka qenë gjithmonë babai i saj, që ishte mësues në profesion. Pavarësisht karrierës së pasur, Nexhmija iku nga kjo botë me disa pengje. Në aspektin profesional, pengu më i madh ka qenë një koncert recital, të cilin ajo nuk ka mundur të realizojë, për shkak të mungesës së mbështetjes nga institucionet e Kosovës.
