Armando Broja nuk ndalet më. Sulmuesi i përfaqësueses shqiptare ka lënë pas dëmtimin që pësoi në Kupën FA dhe është kthyer me gol në kampionatin anglez, duke ndihmuar Sauthemptonin të fitonte 3-2 një ndeshje të jashtëzakonshme në transfertë ndaj Totenhem.
Broja, i cili pësoi dëmtim në Kupën FA dhe mungoi në stërvitje gjatë kësaj jave, e nisi ndeshjen me vrull dhe ndonëse Totenhemi shënoi i pari, arriti të barazonte shifrat me një goditje të bukur në zonë në minutën e 23-të. Ky ishte goli i tij i gjashtë këtë sezon në Premier Ligë. Më pas, sulmuesi shqiptar kishte mundësi të tjera për të shënuar, në një sfidë ku skuadra e tij vuri në vështirësi të mëdha skuadrën e Kontes.
Vendasit arritën të shënonin golin e avantazhit me Son mes protestave, pasi aksioni nisi me një faull të dukshëm ndaj Brojës. Por kjo nuk dëshpëroi ekipin e Sauthempton, që rrezikoi fillimisht me Brojën t’i afrohej barazimit, e më pas përmbysi sfidën me golat e Eljonusi dhe Adams brenda dy minutash, për të siguruar një fitore të jashtëzakonshme 3-2 në Londër.
Kështu, ekipi i largohet edhe më shumë zonës së ftohtë të klasifikimit, ndërsa Broja regjistron një tjetër gol që e kthen në vëmendjen e opinionit sportiv në Angli, ku shihet si një nga talentet më premtues.
